WADAU WA MAZINGIRA WAKUTANA KUJADILI UHIFADHI BIOANUAI

 

Wadau wa mazingira, misitu kutoka USAID, TFS ma JET wakiwa katika mjadala juu ya masuala ya uhifadhi wa bioanuai

Na Sidi Mgumia, Dar es Salaam

Ili kuwa na uhifadhi bioanuai endelevu wadau wa mazingira nchini wamekutana kujadili hali halisi iliyopo sasa na namna bora yakukabiliana na changamoto zilizopo.

Kupitia mradi wake wa Tuhifadhi Maliasili, Shirika la Marekani la Maendeleo ya Kimataifa (USAID) limewakutanisha wataalamu wa mazingira, misitu pamoja na waandishi kutoka Chama cha Waandishi wa Habari za Mazingira Tanzania (JET) ili kujadili na kusaidia juhudi za uhifadhi wa bioanuai  na mazingira kwa ujumla.

Hilo linajiri wakati ambapo inaelezwa kuwa mazingira haswa misitu hapa nchini inakabiliwa na changamoto za kupanuka kwa miji na kukua kwa shughuli za binadamu; misitu kuchomwa moto, uvunaji haramu na matumizi ya mazao ya misitu yasiyo na tija.

 

“Maeneo ya uhifadhi ni nyenzo muhimu sana katika kukabiliana na madhara ya mabadiliko ya tabia nchi na upotevu wa bioanuai,” alisema Meneja Ufuatiliaji na Tathmini, RTI, Mshirika mtekelezaji wa USAID inayotekeleza Mradi wa USAID Tuhifadhi Maliasili, John Noronha

Noronha amesema maeneo mengi yaliyohifadhiwa yana misitu, majani ambayo yanaichukua hewa ya ukaa kwa asilimia kubwa, kulingana na takwimu za dunia hayo maeneeo yanachukua takriban asilimia 37 ya hewa chafu inayozalishwa duniani ambapo huichukua hewa hiyo na kuipeleka ndani chini ya ardhi.

“Kwa Tanzania ukiangalia maeneo ya uhifadhi tuliyonayo, ardhi asilimia karibia 30 na zaidi imehifadhiwa kwahiyo unaweza ukaona mchango mkubwa uliopo katika kukabiliana na madhara ya mabadiliko ya tabia nchi,” aliongeza Noronha

Aliongeza kuwa maeneo hayo ikija kwenye suala la mabadiliko ya tabia nchi, yanasaidia uhifadhi wa udongo pia yanachangia uwepo wa maji kwa kuhifadhi vyanzo vya maji, hivyo ni muhimu kuvitunza.

“Kingine cha muhimu sana ni kwamba haya maeneo ya uhifadhi ni maabara za utafiti na data kwa ajili yakusaidia kupima viwango vya madhara ya mabadiliko ya tabia nchi na namna gani binadamu wanaishi na mabadiliko haya. Na baada ya utafiti kunapatikana namna nzuri ya kufanya maamuzi sahihi ya maendeleo nchini.

Meneja Ushirikishwaji wa Sekta Binafsi, RTI, Mshirika mtekelezaji wa USAID inayotekeleza Mradi wa Tuhifadhi Maliasili, Dk. Elikana Kalumanga amesema bioanuai  ambayo ni ulimwengu wa asili unaotuzunguka, na aina mbalimbali za viumbe, mimea, wanyama na wadudu kwenye sayari yetu  ina mchango mkubwa sana katika uchumi wa nchi. 

 “Kitu ambacho jamii inapaswa kuelewa ni kwamba kila kiumbe kina mchango wake tofauti, mfano bahari, sehemu zenye maji kama vile Ziwa Nyasa, Tanganyika na Victoria, bioanuai zake zina mchango mkubwa sana katika uchumi tena katika ngazi mbalimbali mfano uvuvi unaofanywa na makampuni makubwa au wavuvi waliosajiliwa ambao kodi zao ndio tunaziona mara nyingi sana zinaingia kwenye pato la taifa. Hivyo kuna kila sababu ya watu kuendelea kuyatunza mazingira kwakua yana umuhimu mkubwa sana katika maisha ya kila siku,” alisema Dk. Kalumanga 

Akiongelea kuhusu shughuli za maendeleo na utunzaji wa bioanuai, Dk Kalumanga amesema kuwa ni ngmu kuzuia shughuli za binadamu lakini nchi mbalimbali duniani ikiwemo Tanzania kupitia taasisi husika za mazingira kama vile NEMC waliamua kuweka miongozo na mipango ya namna ya kuhifadhi mazingira ndani ya eneo liliondelezwa ili kukabiliana na uharibifu wa mazingira. 

Kwa upande wake Mkuu wa Sehemu ya Utangazaji Utalii Ikolojia kutoka Wakala wa Misitu Tanzania (TFS), Anna Lauwo alisema mabadiliko ya tabia nchi bado ni changamoto kubwa ulimwenguni, mataifa bado yanaendelea kukuna vichwa kutafuta namna za kupambana na changamoto hiyo. 

 

“Mabadiliko ya tabia nchi yalianza miaka mingi iliyopita ulimwenguni na kwa Tanzania athari za mabadiliko hayo zilianza kuonekana mwaka 2009, kukaanzishwa  miradi mbalimbali ya kuhifadhi ardhi, mradi wa kwanza ulikuwa Babati mkoani Manyara ambao ulikuwa wakuhifadhi miti na kuweka matuta yanayoitwa makinga maji ili mvua ikinyesha maji yaingie chini na kuhifadhiwa. Miradi yote hiyo katika maeneo mbalimbali nchini ilikuwa na lengo la kukabiliana na mabadiliko hayo,” alisema Lauwo

Lauwo alisisitiza kuwa pamoja na hilo Serikali ilianzisha mikakati ya kurekebisha sera, sheria, miongozo zinazoendana na masuala ya mabadiliko ya tabia nchi kwa ajili yakuonyesha ni jinsi gani watakabiliana na hayo maabadiliko.

 

Ikiwa kama changamoto ya dunia, Lauwo alisema mwaka 2011kulifanyika kikao mjini Born, Ujerumani maamuzi yakawa ni kurejesha uoto wa asili (misitu) hekta milioni 350 ili kuokoa mazingira duniani, wakakubalina kila bara lirejeshe kiasi kadhaa ambapo Afrika ilikubali kurejesha hekta milioni 100. Mwaka 2013 Afrika ilikutana nchini Afrika Kusini kujadili namna yakutekeleza makubaliano hayo ambapo Tanzania ilisema inachangia hekta bilioni 5.2 kulingana na uchafuzi wa mazingira uliopo.

 

“Mataifa yaliona njia rahisi isiyo na gharama yakukabiliana na mabadiliko ya tabia nchi ni kurudisha uoto wa asili kwa maana ya kupanda miti, hii ni kwasababu chakula cha miti ili iweze kuishi ni caborndiyoxide na yenyewe inatoa oxygen inayosafisha anga na ndio maana tunasema kwa mfano msitu wa Pugu ni mapafu ya Dar Es Salaam kwakua kazi ya mapafu ni kusafisha damu na ndivyo ilivyo kwa miti kusafisha anga,” alisisitiza Lauwo

 

Akifafanua zaidi juu ya mjadala huo kwa waandishi wa habari, Mwenyekiti wa Chama cha Waandishi wa Habari za Mazingira Tanzania (JET), Dk. Ellen Otaru alisema lengo kuu la mjadala ni kuibua masuala ya msingi yanayohusu utunzaji wa bioanuai na mazingira kwa ujumla, kujua namna bora yakukabiliana na changamoto za mabadiliko ya tabia nchi lakini pia kuwafikishia ujumbe wananchi, watunga sera na wadau wengine wa mazingira kupitia habari zilizoandikwa kwa kina zenye uwazi na uelewa mkubwa.

 “JET tuna nafasi kubwa sana yakuwaelimisha na kuwabadilisha uelewa wananchi, watunga sera, watekelezaji na wawekezaji juu ya masuala ya uhifadhi wa bioanuai kwa maana ya umuhimu wake, faida zake lakini pia madhara yatokanayo na uharibifu wa bioanuai hizo na namna Serikali na ulimwengu zinavyopambana na changamoto hizo,” alisema Dk. Otaru

Nchini Tanzania, ongezeko la idadi ya watu, usimamizi mbovu wa mazingira, shughuli za kilimo na mabadiliko ya tabia nchi vinatishia hali ya maisha kote mijini na vijijini pamoja na masuala muhimu katika kusaidia juhudi za uhifadhi wa bioanuai.