USHIRIKIANO, JITIHADA VYAHITAJIKA KUBORESHA UHIFADHI MAENEO YA BAHARI NCHINI

 

Washiriki wa mkutano ambao ni wadau wa mazingira kutoka taasisi mbalimbali nchini wakiwa katika picha ya pamoja 

NA SIDI MGUMIA, TANGA

Mkutano wa wadau wa mazingira nchini uliofanyika hivi karibuni mjni Tanga umebaini kuwa juhudi za kukabiliana na mabadiliko ya tabia nchi bado zinahitajika na iko haja ya kuongeza ushirikiano wa kitaifa na kimataifa.

Mkutano huo ni sehemu ya Mradi wa Uhifadhi mzuri wa maeneo makubwa ya bahari kwa ajili ya maendeleo endelevu  ya watu, hali ya hewa na viumbe (ReSea) unaotekelezwa na shirika la Mission Inclusion (Mi) na Shirika la Umoja wa Kimataifa wa Uhifadhi wa Mazingira (IUCN) nchini Comoro, Kenya, Madagascar, Msumbiji na Tanzania.

Mradi huo unalenga kuimarisha uwezo wa kustahimili hali ya kijamii na kiuchumi kwa watu wanaoishi katika jamii za pwani na kukabiliana na athari mbaya za mabadiliko ya hali ya hewa.

Akizungumza wakati wa ufunguzi Mkurugenzi Idara ya Misitu Zanzibar, Said Juma Ali amesema “Sisi kama wadau wa mazingira tunahitaji kushirikiana kikamilifu na tuwe wawakilishi wema kwa jamii zetu na kwa kupitia mradi huu wa ReSea tuwe mfano mzuri hata kwa wengine  kwakua tayari tunayo mambo mengine mengi ambayo tunajivunia kama waanzilishi na kuwa mfano wa kuigwa.

Afisa Uvuvi kutoka Wizara ya Uchumi wa Buluu na Uvuvi Zanzibar, Abdalla Hemed akiwasilisha yaliyojiri kikao kilichopita walipojadili maeneo yaliyopendekezwa kwa ajili ya mradi Pemba

Ameongeza kuwa mradi huo umekuja kwa ajili yakusaidia kurejesha mifumo ya ikolojia, hivyo ikiwa hai basi kila kitu kinakuwa sawa. Pia amewasihi wanajamii kuacha kufanya matumizi yasiyo ya msingi kwenye maeneo yao, wasimamie mazingira ili kurejesha uoto wa asili kwa manufaa ya nchi.

“Ukweli ni kwamba Tanzania itajengwa na sisi wenyewe, watu watakuja kutusaidia tu na itakuwa ni kuendeleza pale tulipofikia hivyo tuna kila sababu kusimama imara kama wataalamu na kushiriki kutoa michango yetu yenye tija ili kuhakikisha mradi huu unasonga mbele kwa faida ya nchi nzima,” alisisitiza Ali

Awali akiongelea lengo kuu la mkutano huo Afisa NbS kutoka IUCN, Selemani Mohamed amesema wamekutanisha wadau ili watoe ushauri na kujadili juu ya kutambua na kuanzisha maeneo ambayo yatatumika kama shamba darasa katika kutumia suluhisho za asili (Nature based Solutions-NbS) katika kukabiliana na uharibifu wa mazingira kwa kuzingatia masuluhisho ya urejeshaji wa mfumo ikolojia jumuishi katika bahari ya Tanga-Pemba.

Aliongeza kuwa mkutano huo pia ulilenga kujadili kuundwa kwa mtandao ambayo itakuwa ni maalumu kwa ajili yakuendesha na kusimamia shughuli za mradi wa ReSea katika maeneo yaliyopendekezwa kwa lengo la kuhakikisha mradi unafanyika kikamilifu lakini pia ili ulete matokeo chanya kwa jamii na nchi kwa ujumla.

Akitoa mchango wake Afisa Mazingira Mkoa  wa Tanga, Mary Faustine amewasihi wadau wa mazingira ambao wameshiriki katika mkutano huo kuwa mabalozi wazuri wa mradi kwa kutoa elimu kwa wana jamii lakini pia kuendelea kutoa ushirikiano kwa mradi ili waweze kutimiza malengo yake.

“Lazima jamii na wataalamu wa serikali na mradi tufanye kazi kwa pamoja kwa kuwapa ushirikianao wanajamii pale wanapohitaji msaada wetu ili mradi huu ulioko chini ya IUCN uweze kuwa endelevu na uweze kuleta matokeo chanya.”

“Pia kwakua hii inahusiana na madadiliko ya tabia nchi niwaombe IUCN kupitia mradi huu wa ReSea ikiwapendeza muongeze maeneo ya kuyafanyia kazi kwakua kuna maeneo mengine mengi yameathirika kama Handeni na kwingineko ili kumsaidia Rais Samia Suluhu Hassan kusukuma gurudumu la taifa. Ninashukuru na kuwapongeza kwa lengo zuri la mradi ambalo linaendana kabisa na vipaumbele vya taifa letu”, alisema Faustine

Mtaalamu kutoka Taasisi ya Sayansi za Bahari, Chuo Kikuu cha Dar Es Salaam, Edward Paul akiongea na washiriki wa mkutano

Kwa upande wake Afisa Uvuvi Wilaya ya Pangani, Joel Mabagale akitoa mrejesho wa maeneo yaliyopendekezwa kwa ajili ya kutekeleza mradi, alisisitiza kuwa zoezi hilo limefanywa kwa kuzingatia jamiii kwakua wanatambua mchango wao na kuwathamini, hivyo wana jamii walishirikishwa kikamilifu kwenye zoezi hilo muhimu.

“Zoezi hili limewashirikisha wanajamii kwa asilimia zote kwakua wao ndio walengwa wakuu katika mradi, wanayafahamu kwa undani maeneo wanayoishi na wanajua ni maeneo gani yanahitaji kuzingatiwa zaidi. Vilevile, baadhi yao wameshaanza kufanya urejeshaji kwenye baadhi ya maeneo na matokeo yameanza kuonekana,” alisema Mabagale  

Aidha, Mabagale alisema kuwa kwa upande wa Tanga katika maeneo ya Pangani na Mkinga walipendekeza baadhi ya maeneo kama vile Kwa Mchaga, Jangwa la Mchawi, Kwa Mngumi, Kipwani, Wanaunguja, Mtoni na Mwaluseba. Kwa Pemba walipendekeza eneo moja moja kutoka katika wilaya zote nne za Micheweni, Wete, Chake Chake na Mkoani.  Maeneo hayo yalipendekezwa kwakua ndio yaliyoathiriwa na mabadiliko ya tabia nchi na yanahitaji kufanyiwa kazi.

Akieleza changamoto wanazokutana nazo kwenye jamii, Afisa Urejeshaji Mikoko kutoka taasisi ya Mwambao, Catherine Fridolin anasema kuwa changamoto juu ya masuala ya NbS ni kwamba uelewa bado ni mdogo, wengi hawafahamu kwa nini mikoko itunzwe na inafaida gani.

“Bado tunaona kuna uhitaji wa kuongeza elimu kwa jamii lakini pia kuongeza ushirikiano kati ya taasisi zisizo za kiserikali na za kiserikali kama vile Wakala wa Misitu Tanzania (TFS) kwenye kueneza elimu na ujuzi juu ya upandaji na uoteshaji wa mikoko. Pia tunaona katika maeneo tunayofanya nayo kazi hamasa hakuna, watu wa kamati ya kutunza mikoko bado hawayatambui majukumu yao vizuri,”

Aliongeza kuwa, “elimu hiyo itolewe kwakuwaelimisha juu ya masuala ya kufanya doria za mikoko, kuchukua takwimu na taarifa muhimu za aina ya miche, idadi yake na kujua lini wamepanda na ni kwa muda gani ili kuhakisha kwamba wanakuwa mstari wa mbele kuzimiliki na kuzitunza hizi rasilimali na kuzirejesha katika uhalisia wake kwa ajili ya maisha yetu lakini pia kwa vizazi vijavyo,” alisema Fridolin

Kuhusu ushiriki wa wanawake, Fridolin alisema kadri mambo yanavyokwenda wanaona muitikio wa wanawake umekuwa mkubwa na hata ushiriki wao katika Umoja wa Usimazi wa Rasilimali za Bahari (BMU) ni mkubwa ukilinganisha na hali ilivyokuwa hapo awali, kifupi ni kwamba idadi ya wanawake kushiriki kwenye kuzitunza rasilimali zilizopo hasa mikoko inaridhisha.

Washiriki wa mkutano wakifuatilia mawasilisho kwa makini

Naye Afisa Misitu kutoka Ofisi ya Rais-TAMISEMI, Felista Kagembe ameshauri kwamba ni vyema wakati wa zoezi wataalamu wazingatie kutokutumia mimea vamizi kwani ni hatari na huharibu kabisa mimea asilia ambapo inaweza pia kuharibu viumbe hai vya majini na kusababisha vikatoweka kabisa.

Pamoja na mambo mengine wadau hao walikubaliana kwa pamoja kuendelea kutoa ushirikiano kwa ajili ya kuunga mkono mradi katika hatua zote muhimu zinazoendelea kwakua imani kubwa waliyonayo ni kwamba ili mradi ufikie malengo yake ni vyema wadau wote wakashiriki kikamilifu.

Washiriki wa mkutano wakifuatilia jambo

Mkutano huo wa siku mbili uliandaliwa na IUCN na kuhudhuriwa na wadau wa mazingira kutoka taasisi mbalimbali kama vile Chama cha Waandishi wa Habari za Mazingra Tanzania (JET), Shirika lisilo la kiserikali la Sea Sense, CAN Tanzania, Shirika la UZIKWASA, Maafisa Uvuvi kutoka Tanga na Pemba pamoja na Mtandao wa Jamii za Pwani, Pemba, Unguja na Tanga.