TAMWA YAPANIA KUIMARISHA UANDISHI WA HABARI KUHUSU HAKI YA AFYA YA UZAZI

 

Meneja Mipango wa TAMWA, Silvia Daulinge

NA SIDI MGUMIA, DAR ES SALAAM

Chama cha Wanahabari Wanawake Tanzania (TAMWA), kwa kushirikiana na taasisi ya Well Spring, kimeendesha mafunzo maalum kwa waandishi wa habari kuhusu namna bora ya kuripoti masuala ya haki ya afya ya uzazi kwenye vyombo vya habari. Lengo kuu ni kuongeza uelewa wa jamii, kupaza sauti za wanawake na wasichana, na kuhakikisha masuala haya yanapewa nafasi ya kutosha kwenye mijadala ya kitaifa.

Mafunzo hayo, yaliyofanyika katika ofisi za TAMWA, Sinza, Dar es Salaam, yalihudhuriwa na waandishi kutoka vyombo mbalimbali vya habari nchini.

Umuhimu wa Mradi

Meneja Mipango wa TAMWA, Silvia Daulinge, alisema mradi huu unalenga kuhuisha huduma za habari kwa kuzingatia usawa wa kijinsia na ustawi wa afya ya uzazi.

“Tunataka kuongeza mijadala ya kina kwenye vyombo vya habari kuhusu haki ya afya ya uzazi, ili jamii ipate taarifa sahihi na kwa wingi. Masuala haya yamepewa kipaumbele kidogo, hivyo tunataka kuamsha uandishi wa habari zenye uchambuzi na zinazochochea mabadiliko,” alisema.

Daulinge aliongeza kuwa mradi huo pia unachangia utekelezaji wa Lengo la Maendeleo Endelevu Namba 3, linalohusu afya na ustawi wa watu, hususan wanawake na wasichana wadogo.

Dkt. Syriacus Buguzi, Kiongozi Mwandamizi wa Utafiti kutoka Utafiti Forum akifafanua jambo kwa washiriki wa mafunzo

Wito kwa Waandishi wa Habari

Dkt. Syriacus Buguzi, Kiongozi Mwandamizi wa Utafiti kutoka Utafiti Forum, alisisitiza umuhimu wa waandishi kuzingatia maadili na kuepuka upotoshaji wa taarifa, iwe kwa makusudi au bila kukusudia.

“Tusiandike habari zinazoweza kupotosha jamii. Badala yake, tuandike kwa mpangilio mzuri, tukitumia vyanzo sahihi ili kuongeza uelewa wa wananchi kuhusu elimu ya afya ya uzazi,” alisema.

Mkurugenzi Mtendaji wa TAMWA, Dkt. Rose Reuben

Sheria na Kanuni Muhimu

Mkurugenzi Mtendaji wa TAMWA, Dkt. Rose Reuben, alieleza kuwa waandishi wanapaswa kuzingatia sheria na kanuni zilizopo wanaporipoti masuala ya afya ya uzazi.

“Kwa kuandika habari zikielezea sheria na miongozo husika, tunaweza kusaidia jamii kujua haki zao na pia kupunguza changamoto kama mimba za utotoni, ndoa za utotoni na ukatili wa kijinsia,” alisema.

Alisisitiza kuwa uandishi wa habari ukitumia msingi wa kisheria unaweza kusaidia hata kuibua sheria mpya au marekebisho ya sera ili kuendana na matakwa ya kitaifa na kimataifa.

Neema Kasaburilo, Afisa Jinsia na Habari-TAMWA

Changamoto Zinazoathiri Haki ya Afya ya Uzazi

Kwa mujibu wa Neema Kasaburilo, Afisa Jinsia na Habari kutoka TAMWA, utafiti wa awali wa mradi ulibaini changamoto kadhaa, ikiwemo:

Upotoshaji wa taarifa kupitia mitandao ya kijamii kwa vijana kutokana na kukosa mwongozo kutoka kwa wazazi.

Upungufu wa huduma vijijini na umbali wa vituo vya huduma, hali inayoongeza hatari ya ukatili kwa watoto.

Uwakilishi mdogo wa vijana kwenye mchakato wa maamuzi ya sera za afya ya uzazi.

Mimba za utotoni kutokana na kuanza mahusiano ya mapenzi wakiwa na umri mdogo.

Ukatili wa kijinsia unaofanywa na watu wa karibu wa familia na kushindwa kuripoti kutokana na hofu au ukosefu wa uaminifu na wazazi.

Uendelezaji wa ukeketaji, ikiwemo katika baadhi ya maeneo ya mijini kama Kipunguni, Dar es Salaam, jambo linalokosa ufuatiliaji na uripoti wa kutosha.

Mafunzo yakiendelea

Hitimisho

Kupitia mafunzo haya, TAMWA na Well Spring wanatarajia kuandaa kizazi cha waandishi wa habari watakaoripoti masuala ya haki ya afya ya uzazi kwa weledi, uadilifu na uchambuzi wa kina. Lengo ni kuhakikisha kwamba sauti za wanawake na wasichana zinasikika na changamoto zinazowakabili zinapatiwa ufumbuzi kupitia uhamasishaji wa kitaifa.