Furaha ya ushindi wa bao 5-0 iliyoupata timu ya Yanga dhidi ya JKT Tanzania kwenye mchezo wa Ligi Kuu ya NBC uliochezwa leo kwenye uwanja wa Azam Complex, uliopo Chamazi jijini Dar es Salaam ni kama imevurugwa na mchezaji wao wa zamani Gael Bigirimana.
Taarifa kutoka Shirikisho la Soka Tanzania (TFF) iliyotolewa usiku huu, imeweka wazi kuwa Yanga inadaiwa na Bigirimana na hivyo kuifungia kufanya usajili wowote hadi pale itakapomlipa mchezaji huyo.
Uamuzi huo uliotangazwa na TFF umetolewa na Shirikisho la Soka Duniani (FIFA) baada ya Bigirimana kushinda kesi dhidi ya klabu hiyo.
Bigirimana aliishtaki Yanga ndani ya FIFA kutokana na kutomlipa fedha zake za ada ya usajili.
Yanga ilipewa siku 45 za kumlipa Bigirimana, hata hivyo haikufanya hivyo, jambo lililoisukuma FIFA kuzuia timu hiyo kuendelea kufanya isajili.
Katika kuhakikisha Yanga inamlipa mchezaji huyo FIFA imeifingia Yanga kufanya uhamisho wa kimataifa na TFF nayo imeizuia kufanya uhamisho wa ndani.
Ili kuepukana na kadhia hiyo TFF imezitaka timu za Tanzania kihakikisha zinavunja mikataba yake kwa kufuata sheria na taratibu zilizopo.
Adhabu hii haiwagusi wachezaji ambao usajili wao umeshakamilika.
0 Comments